من عيون الناس تتعلم طباع البشر تحب وتعشق وتكلم بدون كلام

عل الواحده….والعين مش واحده
نهي اباظه
علي الواحده …والعين مش واحده ….واحد بتشوفك اتنين ..متغير أو صافى النية…بكذا منظر .بتشوفك العين ..
والفارغه غير المليانه ..العين دايما مياله ..تسرق نظره مابين اتنين
وعل الواحده ….والعين مش واحده
عل الواحده والعين صاروخ ….طالع نازل ..مش بيدوخ ..
عين عل الرايح …عين عل الجاى .. المطفي اكيد ليه ولاعه …و الل بيلمع ملوش زى …
.تستنى كل التفاصيل .لو كنت نمله وف حالك….. العين بتخليك الفيل ..
على الواحده والعين مش واحده
على الواحده والننى عقرب ساعه عمال بيدور …المتصلح عادى عنده زى المكسور .
قافل .. يبقي نكدى ومغرور ….يضحك حاله فل ومستور….
طب لوسلم باس ..مصلحه واونطه …..جاى محمل ..طب ايه ف الشنطه…
ويوم ما اتعلم عليك الصح ….تستنى تجيلك غلطه
وعل الواحده ..والعين مش واحده

على الواحده والعين لو حمرا حتوريك…والشكاكه ترمى السهم عشان تبليك ..وعين الجمل للتسليه ..وعين السمكه عايزه عمليه …وعين شمس جدعان من الل هى…
وعين رصداك ..من تحت لتحت ما بتسميش ….وعين مش سايبه حد ف حاله مابتخليش,
وعين مطفيه تشوف بالقلب ماتفضحنيش …وعين بجحه تقول اللى تقوله ماتختشيش ..
وعل الواحده ..والعين مش واحده

.على الواحده وسحرها يغنيها ….. تسحرفيها كل الل غاويها..
الرمش بيدبح عل الهادى,,,والحاجب مرفوع بالهمزه
.مهما تكون جامد ومعلم.. تقع فيها يادوب بالغمزه..
وعل الواحده….. والعين مش واحده