Mahmoud Kamal
في توقيت بالغ الدقة و الحساسية، شاهدنا جميعاً زيارة اللواء حسن رشاود رئيس المخابرات العامة المصرية إلى ليبيا، لتؤكد أن مصر بتتحرك وقت الجد وبتواجه التحديات بحسم وهدوء. الزيارة دي مش بداية حضور… مصر كانت دايماً موجودة و داعمه لإستقرار ليبيا الشقيقة والدليل إننا الرئيس هو اللي رسم الخط الأحمر سرت – الجفرة، وقت ما الكل كان سايب الساحة و مازال الخط قائم.
التحرك المصري في اللحظة دي بالذات مش صدفة. بالعكس، جاي في توقيت حساس جداً وسط كلام كتير حوالين نقل بعض الفلسطينيين إلى غرب ليبيا وفتح سجون وتحريك مليشيات وتدوير مجرمين في مشهد عبثي ممكن يولّع المنطقة كلها. لكن مصر مش هتقبل بده ولا هتسيب حدودها الغربية تتلعب بيها والزيارة دي جاية علشان تقطع الطريق على أي مخطط، وتوصل رسالة واضحة: فيه دولة إسمها مصر… شايفة وسامعة وعارفة وفاهمة و مخططه وبتتحرك بهدوء و قوة و ثبات و عزيمة و يقين بالإنتصار أمام كل التحديات.
اللواء حسن رشاود مش مجرد مسؤول عادي، ده رئيس جهاز مخابراتي هو الأقوي و الأقدم بالعالم و هو شخصياً عقل إستراتيجي من طراز خاص و وجوده في ليبيا معناه رسالة سياسية وأمنية في نفس الوقت لكل اهل الشر: “مصر موجودة، بالمعلومات و الجانب الليبي بالسلاح و الجنود… ومحدش هيعرف يعمل حاجه” و هي رسالة تأكيد و جود و دعم و تحذير بدون كلام كتير أن الخط الأحمر لسه مرسوم واللي عايز يجرب يقرب.
